it cz lt rb
ua fr pl en
se by
Mar 03

"Я хачу сказаць шчыры дзякуй усім тым, хто ўзгадаў, што ў мяне дзень нараджэння, хто пажадаў мне добрага настрою. І ў сваю чаргу я ім жадаю і настрою, і поспехаў. Хай будзе больш людзей, якія паспачуваюць, якія не злыя, а ласкавыя. Хай будзе ўсё добра".

Запісаў Сяргей Шапран 24 лютага 2014 года, у Дзень народзінаў Рыгора Барадуліна. У гэтым аўдыё дзядзька Рыгор дзякуе ўсім, хто яго павіншаваў.

Тэгі:

Mar 01

rb1

1 сакавіка 2014, 20:30

 

Тэгі:

Feb 23

Сяргей ШАПРАН, Новы час, 23.02.1014

24 лютага Рыгору Барадуліну споўніцца 79 гадоў. Не юбілей, вядома, але ж добрая нагода пагаварыць з тым, чыё імя ўвасабляе сабой не толькі чалавечую годнасць — яно даўно ўжо стала, разам з імёнамі Багдановіча, Купалы, Коласа, Быкава і Караткевіча, своеасаблівым сімвалам беларускай літаратуры і нацыі.

1_rigor_baradul_n_ljuti_2014_fota_sjargeja_shaprana1

Рыгор Барадулін, люты 2014 года. Фота Сяргея Шапрана

— Дзядзька Рыгор, з якім настроем вы цяпер жывяце?

— Мне і дасюль здаецца, што ўсе старэйшыя за цябе, гэта толькі ты малады. Але часам як узгадаеш, што табе пад 80, нібыта з-за пазухі дастанеш гэтыя лічбы… Я заўсёды думаў, што 80 гадоў — гэта многа і, вядома, ніколі на сябе не прымяраў, а цяпер, калі мне самому столькі, дык адчуваю, што гэта ўсё-ткі мнагавата… Ну, колькі Бог дае, столькі і будзеш жыць, нікуды не ўцячэш, усе гады — плённыя яны ці не — усе яны твае. І чым меней застаецца тых гадоў, тым больш хочацца жыць. Гэта ў маладосці ніколі не задумваешся пра тое і перакананы, што яшчэ шмат часу наперадзе, што ўсё паспееш. А цяпер як паглядзіш, дык падаецца, што ў асноўным усё не тое рабіў у гэтым жыцці — шмат рабіў лішняга, пустога, неабавязковага. Але, з іншага боку, так ужо жыццё ўладкавана. Гэта ж не сцэнарый. Так ужо Бог даў.
Чытаць далей »

Тэгі:

Jan 09

сябры! інфармую, што кніга "Лепей" у Акадэмкнізе (Незалежнасьці, 72) цяпер стаіць не па 146, а па 128 тысяч. з Новага году адмянілі нейкі там падатак -- гэта дазволіла кнігарні зьменшыць кошт.
іншыя месцы продажу кнігі і падрабязьнейшую інфармацыю можна пачытаць ТУТ
l33

Тэгі:

Dec 30

Сяргей ШАПРАН

Надрукавана: Абажур. 2013. № 7 (103)

bar01

Патрыярх беларускай літаратуры Рыгор Барадулін завяршыў 2013 год падвойным святам: выйшлі адразу дзве яго кнігі, і абедзве ўнікальныя — «Вушацкі словазбор» і «Лепей». Калі першую кнігу Барадулін усё жыццё збіраў, дык другую амаль усё жыццё пісаў. Такім чынам, абедзве кнігі для паэта ў многім выніковыя. Пра гэта і гутарым з Рыгорам Іванавічам.

 

— Падчас прэзентацыі «Вушацкага словазбору» ў кнігарні «Логвінаў» Уладзімір Някляеў засведчыў, што неаднойчы бачыў Вас, шчаслівага, з Вашай чарговай новай кнігай у руках, але ніколі не бачыў настолькі радаснага, як пасля выхаду «Вушацкага словазбору»…

— Для мяне выхад гэтай кнігі — вялікая ўрачыстасць для душы. Я ж пачаў запісваць вушацкія словы, якія чуў ад мамы, ад сваякоў, ад суседзяў — вушацкіх людзей, вострых на язык, недзе з класа шостага-сёмага. І, як толькі размова заходзіць пра «Вушацкі словазбор», мне адразу хочацца цытаваць: «Жывець, як золата важыць»; «Каму пільней, таму пыльней». Вушацкае вуха чуе нават, што пяе салавей: «Цімох, Цімох, павёў дзяўчыну ў мох, у мох. Паваліў, загаліў — торк, торк, торк…» У гэтым слоўніку выразы і словы на ўсе выпадкі жыцця. Ёсць, напрыклад, такое ёмістае вушацкае слова «прылюдзіцца» — гэта значыць, прывесці да пэўнага парадку, толку, спарадкаваць. Дык вось, я вельмі ўдзячны Наталлі Давыдзенка, укладальніцы гэтай кнігі, якая зрабіла працу акадэмічнага інстытута: яна не толькі сабрала цэлую трохтонку маіх запісаў, але і, сістэматызаваўшы, прылюдзіла, спарадкавала іх. «Вушацкі словазбор» — гэта не проста слоўнік, гэта слоўнік і ізборнік разам, бо добрую палову кнігі складаюць прыказкі і прымаўкі, прыгаворкі і зычэнні, пад’ялдычкі і цвялілкі, добрыя пажаданні і хуткамоўкі, загадкі і дзіцячыя гульні, звычаі і прыкметы. Тут усяго патроху: і скаромнага, і ўзнёслага.

Сам я па стане здароўя ўжо не мог засяродзіцца на падобнай працы — я нават у алфавітным парадку не склаў бы гэты слоўнік! Таму яшчэ раз хачу адзначыць вялікае старанне Наталлі Давыдзенка — яна нібыта на шахтах працавала. Працаздольнасць у яе шалёная! Між іншым, Наташа — не толькі дасведчаны рэдактар, але і сама паэтка, якая хоць і піша па-руску, але апошнім часам падрыхтавала ўжо дзве свае кніжкі па-беларуску.
Чытаць далей »

Тэгі:

Dec 18

l1

"Лепей" -- кніга рукапісаў Рыгора Барадуліна.

у камплект уваходзяць:

1. кніга рукапісаў "Лепей": 103 вершы ад 1952 да 2013 году, ніводнай друкаванай літары
2. аўдыёкніга "Лепей", начытаная народнай артысткай Беларусі Зінаідай Бандарэнкай
3. камплект з 23 здымкаў у канверце. кожны здымак падпісаны на адвароце Рыгорам Барадуліным. ёсьць здымкі, падпісаныя ягонай мамай Акулінай Андрэеўнай і Уладзімерам Караткевічам.
4. тэчка для кружэлкі і фотак, а таксама падарункавы чахол для ўсяго набора

у Менску кнігу “Лепей ” можна набыць:

* “Кніжны салон” (Калініна, 5, працуе штодня да 19.00, нядзеля выходны) . гарадзкі нумар 385-60-89

* “Акадэмкніга” (Незалежнасьці, 72, працуе да 20.00, субота да 18.00, нядзеля выходны). тэлефон 292-00-52

* кнігарня ЛогвінаЎ (Незалежнасьці, 37а).

сядзіба БНФ (Чарнышэўскага, 3)

* на сайце imbryk.by (з дастаўкай)

каб падпісацца -- і атрымаць кнігу поштаю за 150 тыс. руб., вышліце , калі ласка замову на labadzenka@gmail.com

у замове абавязкова пазначце:

  1. імя і прозьвішча
  2. колькасьць асобнікаў
  3. хатні адрас з індэксам
  4. тэлефон для сувязі (на ўсялякі выпадак).

 

l33

 над кнігай "Лепей" працавалі

Рыгор Барадулін

Зінаіда Бандарэнка (чытаньне вершаў для аўдыёкнігі)

Глеб Лабадзенка (ідэя, укладаньне, прадмова)

Наталля Давыдзенка (спрыяньне ў падрыхтоўцы)

Ігар Віркоўскі (выдавец, паліграфічны чараўнік)

Аляксей Кульбіцкі (вокладка кнігі)

Марцін Русецкі (дызайн)

Ірына Зданевіч (апрацоўка рукапісаў і фота)

Валянціна Кляніцкая (вёрстка)

Чытаць далей »

Тэгі:

Dec 12

запрашаю ўсіх на baradulin.by
калі ласка, дасылайце ўсё цікавае, што знойдзеце пра паэта, на адрас labadzenka@gmail.com
напоўнім сайт разам!
sajt

Тэгі:

Dec 12

Глеб Лабадзенка, для naviny.by

да 17 сьнежня ўключна можна падпісацца на кнігу і атрымаць яе са зьніжкай 40%! падрабязнасьці ТУТ
labadzenka-250n
У Менску выйшла ўнікальная кніга Рыгора Барадуліна “Лепей”, да якой меў шчасьце крыху спрычыніцца.

Гэта зборнік рукапісаў паэта, складзены зь яго нататнікаў. У кнізе няма ніводнай друкаванай літары, усё напісана класікам ад рукі. Нават нумары старонак, зьмест і выходныя дадзеныя. Кніга ідзе не самотна, а цэлым падарункавым камплектам у ладным чахле. Да яе прыкладаецца набор прыватных здымкаў паэта ў канверце, кожнае фота падпісанае ім на адвароце. Некалькі здымкаў мамы паэта ніколі раней не друкаваліся — яны падпісаныя самой Кулінай Андрэеўнай. Скажам, здымак, дзе мама стаіць зь сяброўкай у вушацкім фотаатэлье ды аўтограф: “дарагому сынку ат дьвюх падружак толкі падружка трошку мордачку скрывіла”. Альбо самы ўнікальны здымак набора — бацька паэта Іван Рыгоравіч. Ён загінуў на вайне, і дасюль было вядомае ці не адно-адзінае ягонае фота. А тут — такая знаходка!

Натуральна, што прачытаць цэлую кнігу рукапісаў ня кожнаму будзе адразу лёгка, таму да кнігі ідзе падарункам аўдыёдыск, дзе ўсе 103 вершы бліскуча чытае народная артыстка Беларусі Зінаіда Бандарэнка.

Што да вершаў, то самы раньні датаваны 1952-м годам і падпісаны псэўданімам “Алесь Чабор”. Завяршае кнігу верш, напісаны ў верасьні 2013 году. Дзе яшчэ такое пабачыш — рукапісныя вершы за 61 год (!).

Форму кнігі падказаў сам почырк Барадуліна, які даўно стаў графічным брэндам. Гэта як беларускія руны. Нават той, хто не да донца даўмеецца сэнс, адчуе, што тут ёсьць нешта важнае і галоўнае.

Тое, што Барадулін не баіцца апынуцца голым перад чытачом, стала ясна пасля выхаду кнігі “Паслаў бы табе душу” — перапіскі паэта з мамай. Там чытач дазнаўся, што малады, акрылены паэт не заўсёды пачэсна абыходзіўся з мамай, якой прысьвяціў потым палову сваёй творчасьці… Далёка не заўсёды ўпапад адказваў на маміны лісты ды прыходзіў на вакзал атрымліваць кранальныя перадачы з дому. Прызнацца ва ўсім гэтым — вялікая мужнасьць Барадуліна.

У гэтай кнізе паэт аголены ад першай да апошняй старонкі. Ці ня сьмелы крок — паказаць чытачу ня выпеставаныя чыставыя вершы, а накіды, крэсьленьні, перапісваньні, пошукі?.. Добра відаць, як аўтар шукае патрэбнае слова ці вобраз, ажно пакуль яго самога не задаволіць вынік.

Што было найвялікшым адкрыцьцём падчас працы з нататнікамі Барадуліна? Раптоўнае разуменьне, наколькі дзядзька Рыгор розны — і шчыры ў гэтай рознасьці — на суседніх старонках. Вось вам вершаванае перастварэньне малітвы “Ойча наш…”, а вось — цераз пару старонак — зацемка пра пеўня, які “хоць худы, ды ёбкі” (аўтар сам не ставіць тут шматкроп’я). Вось верш “Пусьці ў душу Хрыста…”, а сьледам — “Паганскія багі”…

Гэтую рознасьць Барадуліна можна назваць коратка: ад “Здубавецьця” (кнігі моцных народных прыбабунек) да “Кстоў” (кніга духоўных вершаў). Цяжка прыгадаць іншага аўтара, чые далягляды творчасьці былі б настолькі шырокія!

Дык вось, сябры, увесь апісаны вышэй цуд ужо зьявіўся ў кнігарнях — і кожны з вас можа стаць ягоным шчасьлівым уладальнікам!

Нашто вам кніга рукапісаў Рыгора Барадуліна? Не, ня толькі як зборнік вершаў або цікавы сувенір. У наш час усё, ажно да паэзіі, чытаецца па дыяганалі. Тут такі нумар ня пройдзе! Хоць почырк дзядзькі Рыгора і ня самы “лекарскі”, аднак з наскоку ня ўсё прачытаеш. Чытаць Барадуліна нясьпешна, асэнсоўваючы — вось да чаго штурхае гэты зборнік.

Што такое “Лепей”? Гэтак назваў свой самы сьвежы нататнік сам Рыгор Барадулін. Там думкі паэта селяцца і цяпер, калі вы чытаеце гэты допіс. Назва для такой кнігі — лепей няма. Пачынаеш чытаць — а з кожнай старонкай усё лепей, лепей і лепей…

P.S. Знайсьці кнігу можна ў кнігарнях “Кніжны салон” (Калініна, 5) “Акадэмкніга” (Незалежнасьці, 72), “Логвінаў” (Незалежнасьці, 37а). А калі з дастаўкай, то на сайтах prastora.by ды imbryk.by.

Апроч таго, запрашаю ўсіх на новаствораны афіцыйны сайт Рыгора Барадуліна — baradulin.by!

Тэгі: ,

Dec 12

Ад чацьвярга, 12 сьнежня, кнігу “Лепей ” можна набыць:

* “Кніжны салон” (Калініна, 5, працуе штодня да 19.00, нядзеля выходны) . гарадзкі нумар 385-60-89

* “Акадэмкніга” (Незалежнасьці, 72, працуе да 20.00, субота да 18.00, нядзеля выходны). тэлефон 292-00-52

* кнігарня ЛогвінаЎ (Незалежнасьці, 37а).

* на сайце imbryk.by (з дастаўкай)

* на сайце prastora.by (з дастаўкай)

(калі недзе няма — калі ласка, паведамце)

Кніга “Лепей” — гэта зборнік рукапісаў народнага паэта Беларусі Рыгора Барадуліна.

Кніга ня мае ніводнай друкаванай літары, усё напісана Рыгорам Барадуліным ад рукі.

Кніга мае ў дадатку цэлы падарункавы камплект:

Дзе можна набыць кнігу Лепей?

1. кніга рукапісаў “Лепей”: 103 вершы ад 1952 да 2013 года, ніводнай друкаванай літары

2. аўдыёкніга “Лепей”, начытаная народнай артысткай Беларусі Зінаідай Бандарэнкай
3. камплект з 23 здымкаў у канверце. кожны здымак падпісаны на адвароце Рыгорам Барадуліным. ёсць здымкі, падпісаныя ягонай мамай Акулінай Андрэеўнай і Уладзімірам Караткевічам.
4. тэчка для кружэлкі і фотак, а таксама падарункавы чахол для ўсяго набора

Па ўсіх пытаннях просьба звяртацца на labadzenka@gmail.com

 

над кнігай “Лепей” працавалі

 

Рыгор Барадулін

Зінаіда Бандарэнка (чытанне вершаў для аўдыёкнігі)

Глеб Лабадзенка (ідэя, укладанне, прадмова)

Наталля Давыдзенка (спрыянне ў падрыхтоўцы)

Ігар Віркоўскі (выдавец, паліграфічны чараўнік)

Аляксей Кульбіцкі (вокладка кнігі)

Марцін Русецкі (дызайн)

Ірына Зданевіч (апрацоўка рукапісаў і фота)

Валянціна Кляніцкая (вёрстка)

Сяргей Шапран (фота на падарункавым чахле, усялякае спрыянне)

Выгляд кнігі і ўсяго набора можна пабачыць на фота.

Тэгі:

Nov 15

slovazborШаноўныя сябры і, вядома, сяброўкі, паважаныя спадары і, канешне, спадарыні, дзякуй за тое, што прыйшлі на свята крывіцкага, вушацкага слова — слова маёй мамы, маіх суседзяў і радні.

Для мяне выхад гэтай кнігі — вялікая ўрачыстасць на душы. Я вельмі ўдзячны тым, хто дапамагаў мне ў працы над “Вушацкім словазборам”. Найперш хачу падзякаваць Наталлі Давыдзенка, укладальніцы кнігі. Гэта менавіта яна не толькі сабрала мае запісы, але і, спарадкаваўшы іх, сістэматызавала. “Вушацкі словазбор” — гэта не проста слоўнік, гэта слоўнік і ізборнік разам, бо добрую палову кнігі складаюць прыказкі й прымаўкі, прыгаворкі й зычэнні, пад’ялдычкі й цвялілкі, добрыя пажаданні й хуткамоўкі, загадкі й дзіцячыя гульні, звычаі й прыкметы. Тут усяго патроху: і скаромнага, і ўзнёслага. Сам я па стане здароўя ўжо не мог засяродзіцца на падобнай працы, таму яшчэ раз хачу адзначыць вялікае старанне Наталлі Давыдзенка — яна нібыта на шахтах працавала.

Я вельмі ўдзячны Уладзіміру Някляеву — чалавеку тонкага густу, першаму дэгустатару “Вушацкага словазбору” і аўтару геніяльнай прадмовы да кнігі. Але Някляеў даўно ўжо даказаў, што здольны літаральна на ўсё: і вершы пісаць, і паэмы, і эсэ, і прадмовы — няма такой галіны чалавечай дзейнасці, дзе б ён не быў першы.

Асобна хачу шчыра падзякаваць рэцэнзенту “Вушацкага словазбору” Кастусю Цвірку, а таксама кіраўніцтву нашага Саюзу беларускіх пісьменнікаў і выдавецтву “Кнігазбор”, бо без іх удзелу выхад кнігі быў бы проста немагчымы.

Звяртаючыся жа да будучых чытачоў “Вушацкага словазбору”, я, вядома, не магу сказаць: “Чытайце абавязкова!” — я хацеў бы, я быў бы рады, калі б нехта прачытаў гэтую кніжку, і, можа быць, вушацкае, маміна слова лягло б яму на душу, як аблокі на смяглую зямлю. Сам я жыву і ратуюся роднай мовай. Самае святое для мяне — гэта мама і мова, мова і мама. Без іх я як без радні. І “Вушацкі словазбор” — гэта мой паклон да зямлі тым, хто пялегваў праз вякі нашае самабытнае слова. Гэта мой паклон маме і родным вушацкім людзям, якія не выракліся свайго. Бо без мовы не можа быць ні асобнага чалавека, ні цэлага народу. І калі маладыя пачнуць адраджаць нашую мову, значыцца, яна будзе жыць. А калі будзе жыць мова — будзе жыць і Беларусь.

Дзякую ўсім!

 

Запісаў Сяргей Шапран

Тэгі: