it cz lt rb
ua fr pl en
se by
Dec 01

Адбылося гэта, у тым ліку, пасля маёй публiкацыi ў "Звяздзе", а таксама іншых публікацый і грамадзкіх акцыяў
У нумары ад 30 лiпеня "Звязда" паведамiла пра прыкры недагляд у Брэсце: на помнiку 1000-годдзя горада было дапушчана 75 граматычных памылак! Большасць з iх былi аднолькавыя — у шрыфце адсутнiчала лiтара "ў".

Тады "Звязда" самая першая напiсала пра гэты факт, а прадстаўнiкi Брэсцкага гарвыканкама паабяцалi нам усё выправiць.

Абяцанне стрымалi — у мiнулую суботу на помнiку з'явiлiся новыя дошкi з надпiсамi. Лiтара "ў нескладовае" заняла сваё пачэснае месца пасля галосных. "Днепра-Бугскi" канал справядлiва стаў "Дняпроўска-Бугскiм", а "Вялiкае княства Лiтоўскае" цяпер паважна пiшацца "Вялiкае Княства Лiтоўскае".

Тэкст падрэдагавалi i скарацiлi — вiдаць, каб менш было прасторы для памылак. У таблiчцы, прысвечанай XVІ стагоддзю, знiкла згадка пра Рэч Паспалiтую. Пэўна, таму, што на старой таблiцы адразу пасля ўсталявання нейкiя хулiганы-палонафобы спiлавалi гэтыя словы. Вырашылi, мусiць, не правакаваць дурняў.

Аднак чамусьцi не ўсе заўвагi "Звязды" былi ўлiчаныя. Берасцейская iкона Мацi Божай так i засталася "асвЯчана" (замест "асвЕчана").

— Усе дошкi сапраўды былi замененыя, — распавёў "Звяздзе" Рыгор БЫСЮК, начальнiк Упраўлення культуры аблвыканкама. — Мы паўторна даслалi тэксты на ўзгадненне ў Iнстытут мовазнаўства Акадэмii навук, яны нам усё зацвердзiлi.

— Наконт "асвЯчана" дадам, што менавiта так нам i ўзгаднiла Акадэмiя навук, — кажа галоўны спецыялiст па ахове гiсторыка-культурнай спадчыны Упраўлення культуры аблвыканкама Леанiд НЕСЦЯРЧУК. — Мы спецыяльна акцэнтавалi на гэтым увагу i атрымалi такi адказ.

— А прозвiшчы старшынi гарвыканкама i архiтэктара мы выправiлi адразу ж пасля публiкацыi ў "Звяздзе", — дадае намеснiк старшынi гарвыкнакама Вячаслаў ХАФIЗАЎ. — Зроблена гэта было на самiм помнiку, без дэмантажу кнiгi летапiсца.

Не будзем апускацца да драбязы i падлiчваць, колькi дзяржаўных грошай можна было б ашчадзiць, каб з першага разу напiсаць пiсьменна.

Фота Аляксандра ШУЛЬГАЧА.

Надрукавана ў "Звяздзе" за 1 сьнежня.

Тэгі: