it cz lt rb
ua fr pl en
se by
Oct 02

А сёлета – 500 гадоў, як гэты княскі род атрымаў у валоданне Нясвіж

перадрук з Еўрарадыё

Менавіта 2 кастрычніка 1413 года ў Гародле 47 шляхецкіх сем’яў атрымалі свае гербы. У тым ліку і Радзівілы. Іх гістарычны продак, баярын Крысцін Осцік атрымаў герб “Трубы” з рук кардынала арцыбіскупа кракаўскага Мікалая Тромбы – самай важнай персоны Польшчы пасля караля. Гэта сведчыць, што Осцік і яго сям’я мелі вагу ўжо ў той час.

Тэлефануем у Варшаву Мацею Радзівілу.

Мікалай (злева) і Мацей Радзівілы з польскай школьніцай, якая несла на ўрачыстасці іх сямейны герб "Трубы".

Мацей Радзівіл: “Гарадзельская унія – гэта пачатак пісьмовай гісторыі нашай сям’і, бо дакументаў з таго часу захавалася вельмі мала. Падчас падпісання уніі Крысцін Осцік атрымаў герб “Трубы”. Гэта – наш прашчур, звесткі пра якога пацверджаныя дакументальна – подпісам пад атрыманнем герба. Сына Осціка звалі Радзівіл, сына Радзівіла – Мікалай Радзівілавіч (Мікалай Стары), а ўжо ягоныя дзеці мелі прозвішча Радзівіл”.

29 верасня ў польскім Замасці (гэта бліжэйшы вялікі горад ад Гародла) адбылася навуковая канферэнцыя.

У цэнтры Замасця былі вывешаныя расцяжкі – у тым ліку і на беларускай мове.

Мацей Радзівіл: “Там былі гісторыкі не толькі з Польшчы, але таксама з Літвы, Беларусі, Украіны і нават Англіі. Было больш за 20 дакладаў, якія павінны выйсці асобнай кніжкай. У нядзелю мы паехалі ў саму Гародлю – сёння гэта маленькая вёска непадалаёк ад украінскай і беларускай межаў.Там была імша ў касцёле, а таксама адкрыццё манумента ў гонар 600-годдзя Гарадзельскай уніі. Было шмат людзей, было вялікае свята”.

Удзельнікі канферэнцыі

Злева направа: Міхал Неміровіч-Шчыт, Мацей Радзівіл, Альгерд Мяйстовіч, Мікалай Радзівіл – нашчадкі тых, хто 600 гадоў таму атрымаў гербы на Гарадзельскай уніі.

Памятны медаль 600-годдзя уніі

Сёлета Радзівілы адзначаюць і не менш значную дату – 500 гадоў сваёй прысутнасці ў Нясвіжы.

Мацей Радзівіл: “У 1513 годзе Ян Радзівіл ажаніўся з Ганай Кішкай. Для мяне гэта сімвалічная дата, калі Радзівілы атрымалі Нясвіж. Гэтую дату Радзівілы шануюць даўно. 100 год таму нават выйшаў памятны медаль – “400 год Радзівілаў у Нясвіжы”. Ёсць дата 1523, калі сям’я Кішкаў і вялікі князь пацвердзілі атрыманне Радзівіламі Нясвіжа. Некаторыя вядуць адлік ад яе. Але дата 1513 – сімвалічная для нашай сям’і”.

Святкаванне 600-годдзя уніі ў Замасці і Гародле

Сучасныя Радзівілы таксама, паводле традыцыі, выпусцілі памятны медаль. На адным баку даты 1513-2013 – 500 гадоў Радзівілам у Нясвіжы, а таксама выява абраза з замкавай капліцы Маці Божай з Ларэта. На адваротным баку – даты 1413-2013 – 600 гадоў, як сям’я Радзівілаў атрымала герб “Трубы” на Гарадзельскай уніі.

У Гародле быў адкрыты памятны знак 600-годдзю уніі.

Урачыстая імша ў касцёле

На вуліцах Замасця былі ўсталяваныя інфармацыйныя стэнды.

Фота забяспечаны сям’ёй Радзівілаў.

Тэгі: